РОҲБАРИЯТИ ТУРКМАНИСТОН БОРИ АВВАЛ НОЗИРОНИ ХОРИҶИРО ДАЪВАТ НАМУД

           Душанбе, 12  декабр. (АМИТ «Ховар»,  Марзия  Саидова). –  Намояндагони Тоҷикистон ҷараёни интихоботи парлумони  Туркманистонро мушоҳида мекунанд, ки 14 декабр баргузор  мегардад. Гурӯҳи  нозирони тоҷик  таҳти  роҳбарии раиси  Комиссияи  марказии интихобот ва  раъйпурсии ҷумҳурӣ  Мирзоалӣ Болтуев дирӯз  ба  Ашқобод  рафт. Мухбири  АМИТ «Ховар»  хабар  медиҳад, ки  инчунин нозирони  мамлакатҳои гуногуни Аврупо, намояндагони созмонҳои  байналхалқӣ  ва ИДМ барои  мушоҳидаи  ҷараёни  интихобот  ба  Туркманистон  даъват  шудаанд. Тавре  хабар  дода шуда  буд,   роҳбарияти  Туркманистон  нозирони  хориҷиро  барои  мушоҳидаи  ҷараёни  интихобот  дар  таърихи  давлат  бори  аввал   даъват   менамояд.  Ба  ақидаи  коршиносон,  ин  иқдоми  роҳбарияти  Туркманистон кӯшиши наздик  сохтани  мамлакат  ба  интихоботи демократии  ғарб  мебошад.