САФИР ДОНИШҶӮЁНИ ТОҶИКИ ҚИРҒИЗИСТОНРО ГИРДИ ҲАМ ОВАРД

Душанбе, 23 декабр. (АМИТ «Ховар», Бекназари Абӯбакр). -Сафири Ҷумҳурии Тоҷикистон дар Қирғизистон Асомиддин Саидов дар арафаи Соли Нав бо донишҷӯёни тоҷики муқими ин кишвар мулоқот кард. Дар мулоқот қариб ҳамаи донишҷӯёни тоҷик иштирок намуданд, ки қариб 150 нафарро ташкил медоданд.  Асомиддин Саидов дар ҷараёни мулоқот иброз дошт, ки кормандони Сафорати Тоҷикистон тасмим гирифтаанд, дар арафаи Соли Нав донишҷӯёни тоҷикро гирди ҳам оранд. Ӯ афзуд, ки сафорат ҳамеша омода аст ба донишҷӯёни тоҷик дасти кӯмак дароз намуда, чунин чорабиниҳо зуд-зуд роҳандозӣ кунад.