БАРНОМАИ ПАСТ КАРДАНИ САТҲИ КАМБИЗОАТИИ БМИМТ ДАР ХАТЛОН АМАЛӢ МЕШАВАД

 Душанбе, 4 январ, (АМИТ «Ховар», Бекназари Абӯбакр). — Бунёди миллии иҷтимоии маблағгузории Тоҷикистон (БМИМТ) омодааст, ки барномаи сеюми паст кардани сатҳи камбизоатиро дар Тоҷикистон амалӣ намояд.Мутахассиси робита бо ҷомеаи БМИМТ Абулқосим Котибов ба мухбири АМИТ «Ховар» иттилоъ дод, ки дар доираи ҳамкориҳои Тоҷикистону Олмон ва мутобиқи шартномаи ба имзорасида байни Бунёди миллии иҷтимоии маблағгузории Тоҷикистон ва Бонки рушди Олмон барномаи «Фондҳо барои мусоидати рушди маълумоти асосӣ ва инфраструктураи ҷамоавӣ» амалӣ шуда, он 14 ноҳияи қисмати ғарбии вилояти Хатлон, аз ҷумла ноҳияҳои Абдураҳмони Ҷомӣ, Бохтар, Ҷиликӯл, Қубодиён, Хуросон, Ҷалолиддини Румӣ, Қумсангир, Носири Хусрав, Панҷ, Шаҳритус, Вахш, Ёвон ва шаҳрҳои Нораку Сарбандро дарбар мегирад.             Арзиши умумии барнома ба 6,72 миллион евро баробар аст, ки аз ин 5,4 миллион евро саҳми ҷониби Олмон буда, 1, 02 миллион евро саҳми Ҳукумати Ҷумҳурии Тоҷикистон ва 0,3 миллион евро саҳми ҷамоаҳоро ташкил медиҳад.