МУЛОҚОТ ДАР ПАЛАТАИ САВДО ВА САНОАТИ ҶУМҲУРӢ

               Душанбе, 23 январ. (АМИТ «Ховар», Покиза Маҳмадбекова). — Раиси Палатаи савдо ва саноати ҷумҳурӣ Шариф Саид бо директори Ширкати байналхалқии намоишгоҳҳои «Гроу интернейшнал» Муҳаммад Имронӣ мулоқот кард. Ҳадафи мулоқот муҳокимаи имкониятҳои дар Тоҷикистон гузаронидани мулоқотҳои соҳибкорону тоҷирон ва ташкили намоишгоҳҳои байналхалқӣ буд. Ш.Саид таъкид кард, ки ташкили намоишгоҳу ярмаркаҳо яке аз самтҳои асосии фаъолияти палата мебошад ва барои ба бозори ҷаҳонӣ баровардани молҳои сохти ватанӣ, ҷалби сармоя ва дарёфти ҳамкорони нав, инчунин бунёди корхонаҳои муштарак нақши муҳим мебозанд. Соҳибкорону тоҷирони маҳаллӣ бо ин роҳ бо маҳсулоти корхонаҳои хориҷӣ шинос гардида, таҷрибаи худро ғанитар мегардонанд.              Паймон карда шуд, ки соли 2009 дар Душанбе се намоишгоҳ ва дар Хуҷанд як намоишгоҳ ташкил карда шаванд.              Инчунин бахшида ба проблемаҳои муҳими тиҷорату соҳибкорӣ машваратҳо ва конфронсҳо гузаронида хоҳад шуд. Дар давоми солҳои 2009 — 2010 китоби «Роҳнамои тоҷирон» ба забонҳои форсию англисӣ ва русӣ чоп карда мешавад.