ОМОДАГӢ БА КОНФРОНСИ БАХШИДА БА АФҒОНИСТОН

Душанбе, 16 январ. (АМИТ «Ховар», Наргис Бойахмедова).- Муовини вазири корҳои хориҷии Ҷумҳурии Тоҷикистон Маҳмудҷон Собиров дар мулоқоти  муовинони вазирони корҳои хориҷии давлатҳои аъзои  Созмони ҳамкории Шанхай , ки дар шаҳри Маскав баргузор гардид, ширкат варзид. Дар ин мулоқот  намояндагони мақомоти муҳофизи қонун низ иштирок доштанд. Аз вазорати корҳои хориҷӣ  ба АМИТ «Ховар» хабар доданд, ки дар ҷараёни мулоқот масъалаҳои омодагӣ  ба конфронси махсуси бахшида ба Афғонистон баррасӣ шуданд. Конфронси мазкур таҳти сарпарастии Созмони  ҳамкории Шанхай гузаронида мешавад. Дар мулоқот аз ҷумла масъалаҳои ташкилии  конфронс муҳокима гардиданд.Дар конфронс масъалаҳои  тақвияти муборизаи муштарак ба муқобили терроризм, хариду фурӯши ғайриқонунии маводи нашъадор ва  ҷиноятҳои муташаккилона муҳокима карда мешаванд, ки  дар Афғонистон торафт бештар ривоҷ ёфта, ба мамлакатҳои ҳамсоя таҳдид менамоянд.