ОЗМУНҲОИ ЭҶОДӢ БА МУНОСИБАТИ 50- СОЛАГИИ ИТТИФОҚИ ЖУРНАЛИСТОН

Душанбе, 6 январ. (АМИТ «Ховар», Тахмина Ғоибназарова).- Иттифоқи журналистони ҷумҳурӣ ба муносибати 50 — солагии таъсиси худ дар байни кормандони воситаҳои ахбори оммавӣ якбора се озмун баргузор месозад. Аз ҷумла барои ба даст овардани ҷоизаи Иттифоқи журналистон ба номи Абулқосим Лоҳутӣ озмуни эҷодӣ эълон карда шуд.Имсол дар байни журналистон барои муайян намудани  хабару мақолаҳои беҳтарин дар воситаҳои ахбори оммавӣ, асари беҳтарини илмию тадқиқотӣ, барномаи беҳтарини радиоӣ, барномаи беҳтарини телевизионӣ ва ғайра озмунҳо гузаронида мешаванд. Ғолибони онҳо 11 март дар Рӯзи матбуоти тоҷик эълон карда хоҳанд шуд.Дар Рӯзи матбуоти тоҷик инчунин  ғолибони «Озмуни донишҷӯёни оянда» ба номи Воҳид Асрорӣ муайян карда мешаванд. Озмуни  мазкур дар байни донишҷӯёни факултаҳо ва шӯъбаҳои журналистика гузаронида мешавад. Имсол  доираи иштирокчиёни озмуни «Қалами заррин»  низ  хеле васеъ гардонда шуд. Ба асарҳои ба ин озмун пешниҳодшуда дар соҳаи иқтисодиёт, сиёсат ва ҷомеа, фарҳанг, варзиш ва сафару сайёҳат, тандурустӣ ва таърих баҳо дода хоҳад шуд.