ҲАМКОРИИ НИЗОМИИ ҚАЗОҚИСТОНУ ИСРОИЛ БА МАНФИАТИ КИСТ ?

                   Вазорати мудофиаи Қазоқистон аз Исроил хоҳиш намуд, ки барои беҳтар сохтани фаъолияти қувваҳои мусаллаҳ ва истеҳсоли навъҳои нави аслиҳа мувофиқи меъёрҳои НАТО ба он кӯмак расонад. Дар Остона ҳатто аз Исроил хоҳиш карда шуд, ки дар Қазоқистон барои истеҳсоли навъҳои нави техникаи ҳарбӣ корхонаи муштарак сохта шавад. Муовини вазири мудофиаи Қазоқистон Қозимурод Маерманов ба хабарнигорон гуфт, ки масъалаи бунёди корхонаи муштарак ояндаи наздик ҳал карда мешавад. Ҷониби Қазоқистон дар ин масъала бо намояндагони ширкати «Солтам систем лтд» -и Исроил гуфтушунид мекунад. Бояд гуфт, ки мутахассисони ширкати мазкур ба қарибӣ дар такмили системаи тӯпхонаи «Семсер» — и Қувваҳои мусаллаҳи Қазоқистон иштирок намуда буданд.                  Коршиноси масъалаҳои ҳамкории низомии Исроил ва мамлакатҳои ИДМ Евгений Сова зикр кард, ки мутахассисони Исроил ва Қазоқистон айни ҳол ба такмили сифатҳои низомии танки шӯравии Т — 72 диққати калон медиҳанд. Коршиносони ҳарбии Исроил дар вақташ ҳамин гуна танкро дар Гурҷистон такмил дода буданд. Қувваҳои мусаллаҳи Қазоқистон имрӯз қариб 600 танки Т — 72 дорад. Пешниҳод карда мешавад, ки коршиносони исроилӣ ба танки мазкур асбобу анҷоми навтарини электронӣ насб кунанд. Инчунин ҳавопаймоҳои шикории Су — 25 аз ҷониби коршиносони исроилӣ ба талаботи имрӯза мувофиқ гардонда хоҳанд шуд.                   Тибқи нақша, дар заминаи корхонаи дастгоҳҳои вазнини Петропавловск корхонаи ҳарбӣ сохта хоҳад шуд. Оянда дар ин ҷо навъҳои аслиҳае сохта мешавад, ки онро ба хориҷа низ фурӯхтан мумкин аст. Дар Қазоқистон чунин мешуморанд, ки Исроил дар минтақаи Шарқи Наздик мунтазам амалиёти ҳарбӣ мегузаронад. Бинобар ин техникаи ҳарбии худро муттасил такмил медиҳад.                  Қайд кардан лозим аст, ки мутахассисони ҳарбии Исроил баъди барҳам хӯрдани ИҶШС бо баъзе мамлакатҳои собиқи шӯравӣ дар соҳаи низомӣ бомуваффақият ҳамкорӣ мекунанд. Вазоратҳои мудофиаи Украина ва Гурҷистон дар ин бобат мисоли равшан мебошанд. Ба қавли Е.Сова, чунин ҳамкорӣ сабаби ташвишу изтироби Маскав нагардида наметавонад. Дар Русия ба ҳамкории мамлакатҳои ҳамсоя дар соҳаи низомӣ диққати махсус дода мешавад.                   Ба қавли коршиносон, қарори Остонаро дар бораи тавсеаи ҳамкории низомӣ бо Исроил ба фиристодани қувваҳои ҳомии сулҳи ин мамлакат ба Афғонистон вобаста кардан мумкин нест. Дар ин бора соли гузашта котиби давлатии Қазоқистон Қанот Саъдибоев сухан ронда буд. Шореҳони ҳарбӣ чунин пешгӯӣ мекунанд, ки Исроил дар оянда пойгоҳҳои таълимии низомии худро барои такмили маҳорати хизматчиёни ҳарбии давлатҳои аъзои НАТО пешниҳод карда метавонад. Чанде пеш хизматчиёни ҳарбии Чехия пеш аз сафарашон ба Афғонистон ду ҳафта дар яке аз пойгоҳҳои низомии Исроил машқ карда буданд. Аз рӯи хабарҳои ғайрирасмӣ, муншии умумии НАТО Яап де Хооп Схеффер аввали моҳи январ ба Тел — Авив ташриф оварда, зимни мулоқот бо роҳбарияти Исроил дар бораи истифодаи пойгоҳҳои низомии мамлакат барои машқи хизматчиёни ҳарбии мамлакатҳои аъзои НАТО пеш аз фиристода шуданашон ба Афғонистон паймон карда буд.                   АМИТ «Ховар» — «Немецкая Волна»                  (Тарҷумаи АМИТ «Ховар»)                  Тарҷумон — Қудратов А.