3,5 ҲАЗОР ДОЛЛАРИ ИМА БАРОИ ТАҲСИЛ ДАР ДАВЛАТИ ФИНЛЯНДИЯ

                     Душанбе, 2 феврал. (АМИТ «Ховар», Мавҷуда Давлатзода).- Сокини кӯчаи Яккачинор 144/1-и ноҳияи Фирдавсии пойтахт Баҳодур Олимови 27-сола ба шӯъбаи корҳои дохилии ноҳияи Фирдавсӣ бо ариза муроҷиат намуда, шикоят кард, ки сокини кӯчаи И.Сомонии ноҳияи Сомонӣ Мирзо Абдураҳмонов бо роҳи фиреб аз ӯ 3 ҳазору 500 доллари ИМА-ро гирифта бар нагардонидааст.                     Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки моҳи июли соли 2008 М.Абдураҳмонов бо роҳи фиреб ба боварии Б.Олимов даромада, дар хиёбони Рӯдакӣ дар назди меҳмонхонаи Авесто бо мақсади тайёр намудани ҳуҷҷат барои равона кардани таҳсил ба давлати Финляндия аз ӯ 3 ҳазору 500 доллари ИМА-ро гирифта, то ҳол на ҳуҷҷат тайёр кардасту ва на маблағи гирифтаашро бар гардонидааст.                     Оид ба ин ҳодиса парвандаи ҷиноӣ боз гардида, тафтиш идома дорад.