ИСТЕҲСОЛИ АЛЮМИНИЙ ДАР ШИРКАТИ «ТАЛКО»КАМ ШУД

                   Душанбе, 26 феврал. (АМИТ «Ховар», Наргис Бояхмедова). — Ширкати «ТАЛКО» бо мақсади сарфаи қувваи барқ ва нигоҳ доштани нишондиҳандаҳои пештараи истеҳсолӣ ҳаҷми истеҳсоли маҳсулоти асосии худ — алюминийро то андозае кам намуд. Бояд гуфт, ки дар ин ҷо соли 2008 — ум 402 ҳазор тонна маҳсулот бароварда шуд. Дар хабари ширкат гуфта мешавад, ки айни ҳол барои таъмини эҳтиёҷоти истеҳсолӣ ҳамагӣ аз се як ҳиссаи қувваи барқи дар мамлакат истеҳсолшаванда истифода бурда мешавад. 70 фоизи даромади умумии ширкат ба ҳисоби буҷети давлат гузаронида мешавад. Ширкати алюминийи Тоҷикистон айни ҳол аз истифодаи қувваи барқ қарздор нест.                   Дар ин ҷо соли 2008 барои истифодаи қувваи барқ зиёда аз сад миллион доллари ИМА пардохта шуд. Роҳбарияти ширкат дар шароити имрӯза бо назардошти бӯҳрони энергетикӣ қарор дод, ки ҳаҷми истифодаи кувваи барқро то 14,5 миллион киловатт — соат кам кунад. Бо ҳамин сабаб сад кӯраи электролизӣ аз кор боздошта шуд.