ИТТИЛООТ БАРОИ ДЕҲҚОНОН

               Душанбе, 10 феврал. (АМИТ «Ховар», Бекназари Абӯбакр). — 7 феврал дар шаҳри Хуҷанд маросими муаррифии маводи иттилоотиву омӯзишӣ барои хоҷагиҳои деҳқонӣ баргузор гардид, ки дар доираи татбиқи лоиҳаи ислоҳоти замин — «Боигарӣ барои ҳама» омода шудааст.              Дар нашри дастурҳои мазкур Созмони ҷамъиятии шафқати «Ҷовид», Созмони ҷамъиятии «Арбитраж» ва Ташкилоти байналмилалии «ACTED» саҳм гирифта, Комиссияи Аврупо маблағашро пардохт кардааст.             Аз СҶ «Арбитраж» ба АМИТ «Ховар» иттилоъ доданд, ки қабл аз таҳияи ин дастурамалҳо эҳтиёҷи деҳқонон ба иттилооту омӯзиш ва масъалаи дастрасӣ доштани онҳо ба ин мавод ба эътибор гирифта шуд.             Гуфтанист, ки барои гирифтани дастурҳо деҳқононро зарур аст, ки 30 фоизи маблағи чопи онҳоро пардохт намоянд, ки он 2 сомонӣ барои 7 дастуру тавсияро ташкил медиҳад.