КОНСЕРТИ ИДОНА БАХШИДА БА ИДИ МИЛИТСИЯ

                    Душанбе, 6 феврал. (АМИТ «Ховар», Мавҷуда Давлатзода).- Имрӯз, 6 феврал милитсияи тоҷик иди касбиашро ҷашн мегирад. Бахшида ба ин рӯз шоми 5 феврал дар «Кохи Ҷомӣ» консерти идона бо иштироки роҳбарият ва кормандони Вазорати корҳои дохилии ҷумҳурӣ баргузор гардид.                    Дар он дастаи ҳунарии ВКД «Сипар», устодони санъат, аз қабили Ҷӯрабек Муродов, Афзалшо Шодиев, Маликаи Саидзод ва амсоли инҳо баҳри болидахотирии низомиёни кишвар сурудҳои ҷолиб пешниҳод карданд. Ёдовар мешавем, ки соли ҷорӣ милитсияи тоҷик 84-сола мешавад.                   Гуфтанист, ки имрӯз, ҷиҳати арҷгузорӣ ба хотири абармардони миллати тоҷик ба пояи муҷассамаи асосгузори давлати тоҷикон Исмоили Сомонӣ ва муҷассамаи «Шаҳидон»-и кормандони ВКД, ки ҳангоми иҷрои вазифа фавтидаанд, маросими гулгузорӣ баргузор гардид.