МУҲОКИМАИ МАСЪАЛАҲОИ ҲАМКОРИИ МАМЛАКАТҲОИ ИДМ ДАР СОҲАИ МАОРИФ

                      Душанбе, 2 феврал. АМИТ «Ховар», Наргис Бояхмедова). — Намояндагони ваколатдори мамлакатҳои ИДМ дар Кумитаи иҷроияи Иттиҳоди Давлатҳои Мустақил дар шаҳри Минск аз 3 то 5 феврали соли равон масъалаҳои марбут ба вусъат бахшидани ҳамкории мамлакатҳояшонро дар соҳаи маориф баррасӣ менамоянд. Онҳо қабл аз ин лоиҳаи созишномаро дар бораи эътирофи ҳуҷҷатҳо оид ба маълумоти олии касбӣ ва қарорро дар бораи нақшаи тадбирҳои рушди минбаъдаи фазои умумии маърифатӣ ва ҳамкории давлатҳои ИДМ дар соҳаи маориф то соли 2010 — ро муҳокима карда буданд. Коршиносон пешниҳод карда буданд, ки ин ҳуҷҷатҳо ба муҳокимаи маҷлиси Шӯрои сарони ҳукуматҳои ИДМ пешниҳод карда шаванд.                     Вале намояндагони баъзе давлатҳо пешниҳод карданд, ки ҳуҷҷатҳои зикршуда таҳлилу такмил карда шаванд. Лоиҳаи созишнома муайян намудани асосҳои эътирофи мутақобалаи ҳуҷҷатҳои давлатиро дар бораи маълумоти олии касбӣ ва ҳуҷҷатҳоро дар бораи таҳсил аз рӯи барномаҳои маълумоти олии касбӣ пешбинӣ мекунад. Лоиҳаи қарор тасдиқи нақшаи тадбирҳои рушди минбаъдаи фазои умумии маърифатӣ ва ҳамкории давлатҳои ИДМ — ро дар соҳаи маориф то соли 2010 дар бар мегирад.