БАҚИЯПУЛИҲОИ АНДОЗ МЕАФЗОЯНД

                      Истаравшан, 19 март. (АМИТ «Ховар», Ҳусейн Нарзулло). — Дар давоми 2 моҳи аввали соли равон ба буҷаи умумиҷумҳуриявӣ ба маблағи 6 198 377 сомонӣ ворид гардид, ки ин бо назардошти андози иҷтимоӣ 108 % — ро ташкил медиҳад. Дар ин давра нақшаи буҷаи маҳаллӣ низ барзиёд иҷро гардид. Ба буҷаи маҳаллӣ ба маблағи 2 893 637 сомонии пешбинишуда 3 154 053 сомонӣ ворид гардид.                       Масъалаи бақияпулиҳои андоз ташвишовар буда маблағи он дар ин давра 6 875 305 сомониро ташкил кард. Сабаби асосии афзоиш ёфтани бақияпулиҳои андоз ин сари вақт пардохт нашудани андози ягона ва андози замин мебошад.                       Бинобар ин дар ҷамъомад Раёсати иқтисод ва савдои дастгоҳи раиси шаҳр, идораи нозироти андоз ва Раёсати молия вазифадор карда шуданд, ки барои ҳарчи камтар сохтани қарзи андоз дар семоҳаи аввали соли равон чораҳои зарурӣ андешанд.