БАРРАСИИ МАСЪАЛАҲОИ ҲАМКОРИИ НИЗОМИЮ ИҚТИСОДӢ

                   Маскав, 11 март (АМИТ «Ховар», Ҳалима Хушқадамова). — Коршиносони давлатҳои аъзои Созмони аҳдномаи амнияти дастаҷамъӣ имрӯз дар Маскав масъалаҳои ҳамкории низомию иқтисодӣ ва низомию техникиро муҳокима мекунанд. Зимни машварати коршиносон мавқеи давлатҳои аъзои созмон доир ба лоиҳаи ҳуҷҷатҳое баррасӣ карда мешавад, ки заминаи асосии меъёрию ҳуқуқии ҳамкории низомию иқтисодии давлатҳои аъзои созмонро ташкил медиҳанд.                    Муовини муншии умумии созмон Валерий Семериков гуфт, ки зимни мулоқот пешниҳоди давлатҳо роҷеъ ба лоиҳаи созишномаҳо дар бораи нигоҳ доштани корхонаю муассисаҳои махсуси истеҳсолкунандаи маводи низомӣ, принсипҳои умумии таъсиси иттиҳодияҳои байнидавлатии илмию истеҳсолӣ, ҳамкории давлатҳои аъзои созмон дар соҳаи ҳамлу нақли молҳои низомӣ ва молҳои махсус баррасӣ карда мешаванд.