ДАЪВАТИ БАҲОРӢ ОҒОЗ ЁФТ

                      Бадахшон, 27 март. (АМИТ «Ховар», Лутфишо Додо).- Дар ВМКБ баробари мавзеъҳои дигари Ҷумҳурӣ даъвати баҳорӣ ба ҷузъу томҳои Артиши миллӣ оғоз гардид. Тавре муовини комиссари ҳарбии вилоят Беҳзод Саидиброҳимов иттилоъ дод, бидуни навоҳии дурдасти Ишкошиму Мурғоб дар ноҳияҳои дигари ВМКБ комиссияҳои даъватӣ таъсис дода шуданд. Дар навоҳии Ишкошиму Мурғоб рӯзҳои наздик таъсис меёбанд. Агар солҳои қаблӣ дар шомили кумиссион гардонидани духтурони пешаҳои гуногун нарасидани кадрҳо мушоҳида мешуд, имсол дар ин боб камбудиҳо нест. Рӯзи 1 -уми апрел нахустин шуда ҷавонони ноҳияи Рӯшон ба ҷузъу томҳои Артиши миллӣ сафарбар карда мешаванд. Фикр мекунам, ки соли ҷорӣ нақшаи даъвати баҳориро хеле барвақт иҷро мекунем, зеро хоҳишмандон хеле зиёданд. Омили асосии ин амал дар он аст, ки аввало тарғиботи кормандони комиссариатҳои ҳарбии шаҳру навоҳии вилоят дигар гардид ва баъдан баъди сафари волидайни даъватшудагон ба қисмҳои ҳарбии мустақар дар гӯшаю канори гуногуни ноҳияҳои вилоят бо беҳ шудани шароити хизматчиён афкори ишон хеле тағйир ёфт.