МАЪРАКАИ НИҲОЛШИНОНӢ ДАР СУҒД

                Душанбе, 2 март. (АМИТ «Ховар», Бекназари Абӯбакр). — 28 феврал дар қаламрави вилояти Суғд тибқи қарори раиси вилоят «Оид ба муташаккилона гузаронидани маъракаи кабудизоркунӣ ва ободонӣ дар вилоят барои соли 2009» ҳашари умумихалқии нишҳолшинонӣ доир гардид.                Аз маркази иттилоот ва таҳлили дастгоҳи раиси вилояти Суғд ба мухбири АМИТ «Ховар» иттилоъ доданд, ки раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон Қоҳир Расулзода ҳамроҳи муовинони худ, роҳабарони як қатор ташкилоту идораҳои давлатӣ ва кормандони дастгоҳи раиси вилоят дар муассисаи давлатии «Боғи миллии Ваҳдат» дар маъракаи ниҳолшинонӣ иштирок намуда, дар ин мавзеъ якчанд бех ниҳол шинонид.                Сипас, Қоҳир Расулзода аз ҷараёни кор дар дигар минтақаҳои ин боғ шиносоӣ пайдо кард ва барои саривақт анҷом додани маъракаи имсолаи ниҳолшинонӣ ба роҳбарону масъулини соҳаҳои дахлдор дастуру супоришҳои мушаххас дод. Раиси вилоят инчунин аз рафти сохтмони чойхонаи миллӣ дар мавзеи боғ дидан намуда, бо кору фаъолияти бинокорон аз наздик ошно гардид.                Қайд кардан бамаврид аст, ки дар маъркаи имсолаи ниҳолшинонӣ дар «Боғи миллии Ваҳдат» қариб 2 ҳазор нафар дар ҳудуди 631 гектар замин, наздик ба 12 ҳазор бех ниҳоли ҳосилдеҳу сояафкан шинониданд.                 Ёдрас мешавем, ки «Боғи миллии Ваҳдат» соли гузашта дар арафаи ҷашнгирии иди Наврўз бо иштироки Сарвари Давлат Эмомалӣ Раҳмон ба фаъолият шурўъ намуда буд.