ШАҲРАКИ НАВ БО НОМИ «БАҲОРИСТОН»

                    Истаравшан, 19 март. (АМИТ «Ховар», Ҳусейн Нарзулло). — Бо пешниҳоди мақомоти иҷроияи ҳокимияти маҳаллии шаҳри Истаравшан Шўрои шаҳрсозии Агентии сохтмон ва меъмории назди Ҳукумати Ҷумҳурии Тоҷикистон масъалаи нақшаи генералии шаҳраки наверо бо номи «Баҳористон» дар шаҳри Истаравшан баррасӣ намуд ва маъқул шуморид, — гуфт муовини раиси шаҳр Ҳакимҷон Бобоев. Дар асоси ин нақша дар қисмати шимолу ғарбии шаҳр дар майдони 200 гектар замин шаҳраки нав иборат аз наздик ба 1 500 адад ҳавлиҳои истиқоматӣ (барои 5 — 6 ҳазор нафар сокинон), биноҳои истиқоматии аз 4 то 9 ошёна (барои тақрибан 20 ҳазор нафар сокинон) бунёд хоҳад шуд. Муҳим он аст, ки ин шаҳрак дар шаҳри Истаравшан нахустин нуқтаи аҳолинишине хоҳад шуд, ки тамоми манзилҳои истиқоматиаш якҷо бо иншооти дар асоси лоиҳаю нақшаҳои шўъбаи меъморӣ ва сохтмони дастгоҳи раиси шаҳр, ки бо назардошти суннатҳои қадимаи шаҳрсозӣ ва санъати меъмории ҳозиразамон сохта хоҳад шуд.                     Дар инҷо ҳамчунин сохтмони 3 бинои мактабҳои таҳсилоти умумӣ, варзишгоҳ, маркази саломатӣ, мағозаҳо, ҳаммом, масҷид, чойхона ва дигар иншооти фароғатию истироҳатӣ ва хизмарасонӣ бунёд мешаванд.