ЗАФАРОБОД ОБОД МЕШАВАД

               Истаравшан, 4 март. (АМИТ «Ховар», Ҳусейни Нарзулло) — Соли 2009 дар ноҳияи Зафаробод «Соли ободонӣ» эълон шуд.                Бино ба гуфтаи раиси ноҳияи мазкур К. Каримов ба ин муносибат боғи фарҳангию истироҳатии ноҳия пурра барқарор шуда, дар майдони «Ситораҳои Зафаробод» нимпайкараҳои фотеҳони Мирзочӯли тоҷик гузошта мешаванд. Биноҳои маъмурию истиқоматии кӯчаҳои марказӣ рангубор гардида дар шаҳраки Зафаробод сохтумони меҳмонхонаи нав, нуқтаи хушкишӯи кимиёвӣ, навбати дуюми бинои мактаби таҳсилоти умумии №22, хонаҳои саломатӣ дар деҳоти Навбаҳор, Сурхоб ва Орзу, гузашта аз ин бунёди 8 га боғ, 2 га токзори нав, эъмори гармхонаҳо ва боз бисёр иншооти тиҷоративу хизматрасонии дигар ба нақша гирифта шудааст.