ДАР РОБИТАҲОИ ПАРЛУМОНҲОИ ТОҶИКИСТОНУ РУСИЯ САҲИФАИ НАВ БОЗ МЕГАРДАД

                Душанбе, 2 апрел.(АМИТ «Ховар», Марзия Саидова).-Тавсеаи ҳамкории парлумонҳои Тоҷикистон ва Русия яке аз масъалаҳои муҳими мулоқоти Раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев бо муовини Раиси Шӯрои Федератсияи Маҷлиси Федералии Федератсияи Русия, Раиси Шӯрои кории Созмони Ҳамкории Шанхай Дмитрий Месенсев буд, ки дар Душанбе баргузор шуд.                  Маҳмадсаид Убайдуллоев ташрифи ҳайати парлумонии Русияро ба Тоҷикистон нишонаи рушди ҳамкорию ҳамгироии байнипарлумонӣ арзёбӣ кард.                  Мусоҳибон масъалаи тақвияти робитаҳои байнипарлумониро дар сатҳи институтҳои амалкунандаи парламентӣ ва вохӯрии навбатии сарони парламентҳои кишварҳои аъзои СҲШ-ро мавриди баррасӣ қарор доданд. Таъкид шуд, ки робитаҳои анъанавию муносибатҳои ҳасанаи дар сатҳи роҳбарияти олии кишварҳо имкон хоҳанд дод, ки тавассути нақши парлумонҳо ва институтҳои фаъоли онҳо дар доираи созмонҳои мухталифи минтақавию байнипарлумонӣ татбиқи барномаҳои мутақобилан судманд амалӣ гарданд. Мусоҳибон ҳамзамон дигар масъалаҳои таваҷҷӯҳи тарафайнро баррасӣ карданд.