АСАРИ НАВИ ТЕАТРИ «ЛӮХТАК»

                        Душанбе, 29 май. (АМИТ «Ховар», Лутфия Эшонқулова).- 6 июн дар Театри давлатии «Лӯхтак» нахустнамоиши асари саҳнавӣ «Нури хуршед» аз рӯи намоишномаи драмматурги машҳури румӣ А. Попэско ба саҳна гузошта мешавад. Намоиши мазкур мазмуни баланди лирикӣ дошта, дар бораи дӯстии мушак бо раққосаи садафӣ, ки баҳри ин дӯстиву рафоқат онҳо тайёранд, ҷони худро нисор кунанд, ҳикоят мекунад. Тавре ба мухбири АМИТ «Ховар» дар театри «Лӯхтак» хабар доданд, ҳунармандон 2 сол боз ният доштанд, ки ин асарро ба саҳна гузоранд. Коргардони он Зафар Ҷаводов буда, дар он нақши асосиро Маҳинбону Ҳасанова иҷро менамояд. Ба наздикӣ намояндагони Вазорати фарҳанг ин намоишномаро қабул карда, ба он баҳои сазовор доданд.                         Ҳунармандони театр умед доранд, ки асари саҳнавӣ ба тамошобинон писанд хоҳад омад.