ХОНАҲОИ БА ИҶОРА ДОДАШУДА ЗЕРИ НАЗОРАТ ГИРИФТА МЕШАВАНД

                        Душанбе, 26 май. (АМИТ «Ховар», Лаззат Диловарзод).- Вазорати корҳои хориҷии Тоҷикистон омори дипломатҳои иҷоранишини хориҷиро дар Ҷумҳурии Тоҷикистон аниқ мекунад,-иброз дошт сардори департаменти иттилоотии Вазорати корҳои хориҷӣ Давлат Назрӣ.                        Бино ба иттилои ҳамин манбаъ, садҳо шаҳрвандони Тоҷикистон манзилҳои истиқоматии худро барои истифодаи иҷора ба шахсони воқеӣ ва ҳуқуқии хориҷӣ супорида аз маблағи ба даст овардаашон андоз намесупоранд. Бинобар ин Вазорати корҳои хориҷӣ аз тамоми сафоратхонаҳо ва ташкилотҳои хориҷӣ гирифтани маълумотҳои заруриро дархост кардааст.                       Дархости Вазорати корҳои хориҷии Тоҷикистон ду ҷиҳат дорад; аввал андозро ба низом медарорад ва дуввум амнияти шахсони воқеӣ ва ҳуқуқии хориҷиро таъмин менамояд,-афзуд Давлат Назрӣ.