МАҶЛИСИ МУШТАРАК ДАР ОСТОНА

                       Маскав, 21 май. (АМИТ «Ховар», Ҳалима Хушқадамова). — Имрӯз дар шаҳри Остона маҷлиси навбатии шашуми муштараки Шӯрои ҳамкории гуманитарӣ ва Раёсати Бунёди байнидавлатии ҳамкории гуманитарии давлатҳои ИДМ баргузор гардид.                           Иштирокчиёни маҷлис масъалаҳои марбут ба густариши ҳамкории Бунёди байнидавлатии ҳамкории гуманитарии давлатҳои ИДМ ва ЮНЕСКО, Кумитаи иҷроияи ИДМ ва Ҷомеаи иқтисодии Евразия, гузаронидани Соли ҷавонон ва ташкили фаъолияти Шӯро ва Раёсати бунёди мазкурро муҳокима намуданд. Рӯзномаи маҷлис, инчунин, баррасии ҷараёни иҷрои нақшаи тадбирҳои аввалиндараҷаро дар соҳаи ҳамкории гуманитарӣ барои солҳои 2009 — 2010 дар бар мегирад. Ҳуҷҷат гузаронидани ҷашнвораҳо, олимпиадаҳо, мулоқотҳо, конфронсҳо, намоишгоҳҳо, марафонҳои телевизионӣ, намоишгоҳҳои китоб ва ғайраро пешбинӣ мекунад. Инчунин, гузаронидани мулоқотҳои зиёиёни илмию эҷодкор, тарҷумонҳои мамлакатҳои ИДМ, тайёрӣ ба таҷлили 65 — солагии ғалаба дар Ҷанги Бузурги Ватанӣ ва ғайра ба нақша гирифта шудаанд.