МИНТАҚАИ ИСТИРОҲАТӢ ЗАРАР ДИД

                         Душанбе, 20 май. (АМИТ «Ховар», Жасмин Назарова). — Дар шаҳри Ваҳдат, шаби 19 май дар натиҷаи омадани сел оби дарёи Кофарниҳон аз соҳил баромад, ки боиси зери об мондани як қисми фароғатгоҳи «Роҳи оҳан»-ро, воқеъ дар дараи Ромит дар километри 51, гардид.                           Тавре ба АМИТ «Ховар» котиби матбуоти Кумитаи Ҳолатҳои фавқулодда ва мудофиаи граждании Ҷумҳурии Тоҷикистон Дустмурод Забиров иттилоъ дод, бинои ошхонаи фароғатгоҳ, ки дар қисмати поён дар наздикии дарё воқеъ мебошад, зарар дид.                            Инчунин дар таҳхонаи ошхона, ки барои истироҳати коргарони ошхона муҷаҳҳаз гардонида шудааст, 5 нафар хоб буданд. Онҳоро якбора об зер намуда дар натиҷа 3 нафар наҷот дода шуда, 2 нафари дигарашон, хоҳарон Шоира Буриева, соли таваллудаш 1980, Сарвиноз Буриева, соли таваллудаш 1992, ки ба ҳайси пешхизмат кор мекарданд ба ҳалокат расиданд.                          Ғайр аз ин дар километрҳои 23-25 роҳи дараи Ромит аз баландиҳо сел фаромада, сангу лойи зиёдеро дар роҳ хобонидааст, ки ҳаракати нақлиётро мушкил гардонидааст. Барои тоза кардани роҳ шабона хадамоти роҳи шаҳри Ваҳдат сафарбар карда шуда дигар чораҳо андешида шудаанд.                          Айни ҳол, наҷотдиҳандагон ва дигар сохторҳои дахлдори Кумита баҳри бартараф намудани оқибати офати табиии ба амал омада чораҳои зарурӣ меандешанд.