НАТИҶАҲОИ АВВАЛИ АМАЛИЁТИ «КӮКНОР- 2009»

                       Душанбе, 20 май. (АМИТ «Ховар», Анварбек Сиддиқов). — 19 май кормандони Раёсати мубориза бар зидди гардиши ғайриқонунии маводи нашаъовари ВКД-и ҷумҳурӣ дар натиҷаи гузаронидани амалиёти махсус дар ҳудуди ҷамоти С. Турдиеви ноҳияи Панҷ шаҳрванди вилояти Тахори Ҷумҳурии Исломии Афғонистон Муҳаммадориф валади Ҳасанбойро дастгир намуданд. Ҳангоми кофтуков аз халтаи ӯ 10 кг 710 грамм афъюн ёфт ва мусодира карда шуд.                      Инчунин, худи ҳамон рӯз кормандони шӯъбаи корҳои дохилии ноҳияи Ҳамадонии вилояти Хатлон дар натиҷаи амалиёти фаврӣ- ҷустуҷӯӣ дар ҳудуди деҳаи «Москва»-и ҳамин ноҳия шаҳрванд Сироҷиддин Назарови 21- соларо дастгир карданд. . Ҳангоми кофтуков аз ӯ 4кг 30 гр ҳашиш ёфт ва мусодира карда шуд.                      Тавре аз ВКД-и Ҷумҳурии Тоҷикистон ба АМИТ «Ховар» хабар доданд, ҳамаи ин амалиётҳои махсус дар доираи амалиёти «Кӯкнор- 2009» гузаронида мешаванд. Оиди ҷиноятҳо парвандаи ҷиноӣ оғоз карданд.