ОҒОЗИ САФАРИ РАСМИИ ПРЕЗИДЕНТИ ХОРВАТИЯ ДАР ТОҶИКИСТОН

                        Душанбе, 24 май. (АМИТ «Ховар», Пайрав Назаров, Фарангис Раҳимова). — Имрӯз, 24 май маросими расмии истиқболи Президенти Хорватия дар майдони назди Қасри Президенти Ҷумҳурии Тоҷикистон баргузор гардид. Ба шарафи меҳмони олиқадр дар майдони назди Қасри Президент парчамҳои давлатии Тоҷикистону Хорватия барафрошта, дастаи посбонони ифтихорӣ саф ороста буданд. Президенти Ҷумҳурии Хорватия Степан Месич ва Президенти Ҷумҳурии Тоҷикистон Эмомалӣ Раҳмон ба пояи ифтихор баромаданд. Баъди ин оҳангҳои миллии ҳар ду мамлакат садо доданд. Сипас Президенти Хорватия Степан Месич ва Президенти Тоҷикистон Эмомалӣ Раҳмон аз назди дастаи посбонони ифтихорӣ гузашта, дар назди парчами давлатии Ҷумҳурии Тоҷикистон ба нишони эҳтиром сари таъзим фуруд оварданд.                       Мухбири АМИТ «Ховар» хабар медиҳад, ки дар Қасри Миллат мулоқоти якка ба яккаи Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Хорватия Степан Месич баргузор гардид. Баъди ин дар фарҷоми мулоқоти ҳайатҳои расмии ҳар ду мамлакат силсилаи ҳуҷҷатҳои байниҳукуматӣ имзо карда шуданд.                       Ёдовар мешавем, ки ҳадафи асосии ташрифи Президенти Хорватия ба Тоҷикистон вусъат додани равобити байнидавлатӣ, равнақу ривоҷи самтҳои афзалиятнок ва ҳамкории иқтисодии ҳар ду мамлакат, инчунин, ба роҳ андохтан ва тавсиа додани равобити илмию маърифатӣ ва фарҳангӣ мебошад. Бояд гуфт, ки ин сафари нахустини Президенти Ҷумҳурии Хорватия ба Тоҷикистон аст.