«РУСТАМ ВА СӮХРОБ» ДАР ҶАШНВОРАИ БАЙНАЛМИЛАЛӢ

                      Душанбе, 20 май.(АМИТ «Ховар», Лутфия Эшонқулова).- Аз 17 то 19-уми июн дар театри ба номи В. Меерхольди шаҳри Маскави Федератсияи Русия Ҷашнвораи байналмилалии ба номи А. Чехов гузаронида мешавад.                      Дар он намояндагони як қатор давлатҳои аъзои ИДМ, аз ҷумла, Театри давлатии драммавии русии ба номи В. Маяковский ширкат хоҳанд кард.                      Намоишномаи «Рустам ва Сўҳроб» аз рўи асари шоири машҳури рус — Василий Жуковский гирифта шуда, дар таҳияи ҳунарманди шоистаи Ҷумҳурии Тоҷикистон Султон Усмонов ба саҳна гузошта шудааст. Рассоми намоишнома Нина Панова буда, дар он ҳунармандони театри мазкур Хуршед Мустафоев, Дмитрий Мурзинов, Фирўза Раҳмонова, Мавлонбибӣ Наҷмуддинова ва дигарон нақш мебозанд.                     Бояд зикр кард, ки намоишномаи номбурда дар Фестивали ҷумҳуриявии театрҳои касбӣ «Парасту 2007» ҷои аввалро ишғол намуда буд.                      Дар ин бора ба мухбири АМИТ «Ховар» аз маркази матбуотии Вазорати фарҳанг хабар доданд.