ТОҶИКИСТОН АЗ СОЗМОНҲОИ БАЙНАЛХАЛҚӢ КӮМАК МЕХОҲАД

                       Душанбе, 20 май. (АМИТ «Ховар», Фарангис Раҳимова ). — Ҳукумати Тоҷикистон аз Созмони Милали Муттаҳид ва созмонҳои дигари байналхалқӣ хоҳиш намуд, ки барои бартараф сохтани оқибати боронҳои тӯлонӣ кӯмаки таъҷилӣ расонанд. Дар муроҷиати Ҳукумати ҷумҳурӣ гуфта мешавад, ки дар натиҷаи боронҳои шадиду тӯлонӣ дар бисёр минтақаҳои мамлакат сатҳи оби дарёҳо баланд гардида, сел омад, масоҳати калони киштзор зери об монд ва маҳалҳои аҳолиниш бар асари фуромадани ярч зарари калон диданд. Дар натиҷаи фалокати табиӣ чандин нафар одамон, аз ҷумла, кӯдакон ҳалок шуданд. Боришҳои шадид умуман ба 40 шаҳру ноҳияи мамлакат зарари калони иқтисодӣ расонд.                       «Ҳукумати Тоҷикистон хабар медиҳад, ки маблағи зарари боришҳо, аз рӯи ҳисобҳои пешакӣ, бештар аз сад миллион долларро ташкил медиҳад. Дар мамлакат 200 хона пурра валангор гардид. Инчунин, садҳо корхонаю муассисаҳои истеҳсолӣ, фарҳангӣ ва иҷтимоӣ, аз ҷумла, мактабҳо ва шифохонаҳо хароб гардиданд, 10 ҳазор нафар бесарпаноҳ монд, 160 километр роҳи мошингард, 40 кӯпрук хароб гардида, хатҳои интиқоли барқ, бунгоҳҳои трансформатории тақсими қувваи барқ ва стансияҳои насосии обкашӣ аз кор баромаданд».                      Дар муроҷиатнома гуфта мешавад, ки «дар натиҷаи боришҳо масоҳати калони киштзор ва зиёда аз 3 ҳазор сар чорво нобуд шуд. Мақомоти мамлакат барои расондани кӯмак ба зарардидагон аз тамоми имкониятҳо истифода мебаранд. Вале Тоҷикистон имкон надорад, ки зарари фалокати табииро бо қувваи худ бартараф созад. Дар мамлакат масолеҳи бинокорӣ, маводи сӯхт, озуқа, дору, семент, хайма ва генераторҳои барқӣ намерасанд».                       «Барои беҳтар сохтани вазъият масъалаҳои таъминоти аҳолиро бо озуқа ва манзили муваққатӣ фавран ҳал кардан лозим аст. Айни ҳол барои барқарор сохтани киштзор қувваю маблағи зиёдро сафарбар намудан лозим меояд», — гуфт зимни сӯҳбат бо мухбири Радиои СММ намояндаи доимии Тоҷикистон Сироҷиддин Аслов.