КАФЕДРАИ НАВ ДАР ДОНИШГОҲИ СОҲИБКОРӢ ВА ХИЗМАТ

                    Душанбе, 28 август. (АМИТ «Ховар», Лутфия Эшонқулова).- Аз соли таҳсили 2009-2010 дар Донишгоҳи соҳибкорӣ ва хизмат кафедраи нави идораи давлатӣ ва маҳаллӣ кушода мешавад. Кафедраи мазкур бо дастгирии Фонди Сорос кушода хоҳад шуд. Мудири кафедра доктори илмҳои иқтисодӣ, профессор Ғафурҷон Ҷурабоев таъин гардид. Ба қавли ӯ 5 дастури методӣ аз рӯи фанни идораи давлатӣ ва маҳаллӣ ба чоп тайёр аст, ки муаллифи яке аз онҳо худи мудири кафедра мебошад.                  Ғ. Ҷурабоев зикр намуд, ки дар охири моҳи сентябр дар донишгоҳ мизи мудаввар ба нақша гирифта шудааст, ки ба он мутахассисон аз мамлакатҳои ҳамсоя ва намояндагон аз мактабҳои олии ҷумҳурӣ даъват карда шудаанд.                   Имсол 2 ихтисоси нав- «Тиҷорати маъмурӣ дар соҳаи хизматрасонӣ» ва «Менеҷмент» омӯхта мешавад. Айни ҳол дар донишгоҳ 3 ҳазор донишҷӯ таҳсил мекунад -қайд кард Ғ. Ҷурабоев.                   Қайд кардан зарур аст, ки барои кушодани кафедраи мазкур Фонди Сорос 22 ҳазор доллари ИМА ҷудо кард.