ПЕШИ РОҲИ БЕМОРИИ СӮХТАНӢ ГИРИФТА МЕШАВАД

                    Душанбе, 17 август. (АМИТ «Ховар», Лаззат Диловарзод).- Бино ба иттилои сардори Хадамоти давлатии назорати байторӣ Муллоҷон Амирбеков, як гурӯҳи мутахассисони соҳа барои аниқ кардани маркази бемории сиёҳзахм — сӯхтанӣ (сибирская язва) ба деҳаи Майдапатаи деҳоти «Ватан» — и ноҳияи Фархор сафар карданд.                    Боиси ёдоварист, ки чанд рӯз пештар бо гумони мубталои сиёҳзахм 11 нафар сокинони деҳаи Майдапатта бистарӣ гардонида шуданд.                  Аз сабаби он ки ин беморӣ аз ҳайвон ба инсон мегузарад, духтурони байторӣ наздик ба 300 ҳайвони майдаро дар маҳалли беморӣ зери ташхис қарор доданд ва дар 30 сар ҳайвон ин бемориро ошкор намуданд.                  Солҳои охир бо сабаби нарасидани доруворӣ ва нагузаронидани эмкунии ҳайвонот ин бемории ниҳоят хавфнок дар минтақаҳои гуногуни ҷумҳурӣ гоҳ — гоҳ пайдо мегардад.Деҳаи Майдапатта ҳоло зери назорати духтурон қарор дорад.                  Барои пешгирии пурраи ин беморӣ бояд оҷилан тамоми ҳайвоноти хурду калони ин деҳа ваксинатсия карда шуда, гӯшти ҳайвоноти фавтида нобуд карда шавад, — афзуд сардори Хадамоти назорати байторӣ доктори илмҳои ветеринарӣ М. Амирбеков.