ТУННЕЛИ ШАРШАР БА ИСТИФОДА ДОДА ШУД

                   Душанбе, 31 август. (АМИТ «Ховар», Пайрав Назаров). — Президенти Ҷумҳурии Тоҷикистон Эмомалӣ Раҳмон 30 август дар арафаи таҷлили 18 — солагии истиқлолияти давлатии Ҷумҳурии Тоҷикистон дар маросими расман ба истифода додани туннели «Шаршар» ширкат варзид, ки дар километри 80 — уми роҳи мошингарди Душанбе — Ваҳдат — Данғара — Кӯлоб воқеъ аст.                    Президенти Ҷумҳурии Тоҷикистон, сафири кабири Ҷумҳурии Мардумии Чин дар Тоҷикистон ва намояндагони ширкати сохтмони роҳу кӯпрукҳои ин мамлакат дар вазъияти ботантана лентаи рамзиро бурида, ба истифодаи расмии туннел ибтидо гузоштанд. Сипас Сарвари давлати Тоҷикистон Эмомалӣ Раҳмон бо рафти кори сохтмончиён шинос гардид. Тибқи пешниҳоди Эмомалӣ Раҳмон, туннели мазкур минбаъд туннели «Озодӣ» номида мешавад.                    Сохтмони туннел моҳи октябри соли 2006 шурӯъ гардида буд, барои сохтмони он бештар аз 130 миллион сомонӣ сарф шуд. Дарозии туннел 2 ҳазору 224 метр мебошад. Ба туфайли ба истифода дода шудани туннел вақти ҳаракати нақлиёт дар роҳи мошингарди Душанбе — Ваҳдат 40 дақиқа кам шуд.                     Мухбири АМИТ «Ховар» хабар медиҳад, ки дар дохили туннел 5 истгоҳи эҳтиётӣ, 10 нуқтаи алоқаи таъҷилии телефонӣ сохта, рӯдаҳои сӯхторхомӯшкунӣ ва дастгоҳҳои ҳавотозакунӣ насб карда шудаанд. Маркази назорати компютерӣ ҳаракати нақлиётро дар дохили туннел назорат мекунад.                     Сипас Эмомалӣ Раҳмон бо оғози тармиму таҷдиди роҳи мошингарди Душанбе — Ваҳдат — Данғара шинос гардид. Ин роҳро низ мутахассисони чинӣ тармим мекунанд. Барои тармими роҳи мошингард аз Душанбе то ағбаи Қулма қариб 230 миллион сомонӣ сарф карда мешавад. Роҳи мазкур на танҳо барои рафту омади нақлиёт дар дохили мамлакат, балки барои ривоҷ додани муносибатҳои тиҷоратӣ бо мамлакатҳои дигар аҳамияти калон дорад.                    Эмомалӣ Раҳмон зимни суханрониаш дар маросими ба истифода додани туннел ҷамъомадагонро даъват намуд, ки дар давоми моҳи шарифи Рамазон ба шахсони камбизоату мӯҳтоҷ ва бемор дасти ёрӣ дароз кунанд.