ДӮЗДОН ДАСТГИР ШУДАНД

                 Душанбе, 2 сентябр. (АМИТ «Ховар», Таҳмина Ғоибназарова).- Шабонарӯзи гузашта дар миқёси ҷумҳурӣ ду ҳодисаи дуздӣ ба қайд гирифта шуд. Дар ин бора ба АМИТ «Ховар» аз дафтари матбуотии ВКД ҶТ хабар доданд.                  Сокини 37-солаи ноҳияи Шоҳмансури пойтахт Дилором Раҳматова ба ШКД-и ноҳия шикоят карда, хабар дод, ки шахси номаълум рӯзона, дар яке аз кӯчаҳо телефони мобилӣ ва ҳамёни ӯро дуздидааст. Арзиши телефон 450 сомонӣ буд ва ҳамёни гумшуда 160 сомонӣ дошт. Дар натиҷаи амалиёти фаврӣ кормандони ШКД-и ноҳияи мазкур Юрий Рогови 33-соларо дастгир намуданд, ки қаблан суд шуда, дар пойтахт қайди зист надошт. Дар вақти ҷустуҷӯ аз ӯ телефон ва ҳамёни Д. Раҳматова ёфт шуд. Аз рӯи ин воқеа парвандаи ҷиноӣ кушода шуда, тафтишот давом дорад.               Ҳамон рӯз дар шаҳри Хуҷанд дар меҳмонхонаи «Эҳсон» Саври Мақсудоваи 26 сола шабона ба ҳуҷраи хоби мусофири 26-сола Сафаралӣ Ҳакимов даромада 600 долларро дуздидааст. Дар натиҷаи ҷустуҷӯ кормандони милиса дуздро дастгир карданд. Акнун дафтари аъмоли духтари дузд тафтиш карда мешавад.