ТАРКИШИ МУДҲИШ ДАР ХИЁБОНИ С. ШЕРОЗӢ

                 Душанбе, 25 сентябр. (АМИТ «Ховар», Жасмин Назарова). – Дар натиҷаи хориҷшавии миқдори зиёди гази табиӣ дар дохили бинои истиқоматии ҳуҷраи рақами 43 воқеъ дар хиёбони С.Шерозии ноҳияи Сино-1, ки ба шаҳрванд Толиб Қурбонов тааллуқ дорад, таркиш ба амал омад.                  Тавре ба хабарнигори АМИТ «Ховар» корманди дафтари матбуоти сарраёсати хадамоти давлатии оташнишонии (СРХДО) ВКД Кароматулло Абдуллоев иттилоъ дод, ба ҷои ҳодиса РСРХДО ВКД ва гурӯҳи навбатдор бо ду автомашинаи сӯхторхомӯшкунии ноҳияҳои Сино-1 ва Фирдавсӣ фиристода шуданд. Ҳангоми ба ҷои ҳодиса расидани оташнишонон маълум карда шуд, ки аз таркиши газ ҳуҷраҳои рақами 42, 44, 45, 47 ва 50 низ зарари ҷиддӣ дида аз таъсири фишори гази табиӣ деворҳои байнӣ қисман фурӯ рафта, дару тиреза ва панҷараҳои оҳанини тирезаҳо ба масофаи 100 м партофта шуд.                  Дар натиҷаи андешидани чораҳои тактикии оташнишонӣ бо роҳбарии сардори сарраёсат, оташнишон полковники хизмати дохилӣ Маҳмадсаид Каримов дар як вақт 42 нафар истиқоматкунандаи биноро наҷот дод. Сӯхтор, ки масоҳати 5 метри мураббаъро иҳота карда буд, ба зудӣ хомӯш карда шуд. Дар баробари ин истиқоматкунандаи утоқи 46 Собир Раззоқовро, ки аз дуди ғализ заҳролуд шуда буд фавран ба беморхона фиристоданд.                  Дар ҷои ҳодиса тамоми хадамоту мақомот ҳозир буда, оид ба ин ҳодиса тафтишот идома дорад, сабаби таркиши газ ва сабабгори ҳодиса муайян карда мешавад.