НОҚИЛҲОИ ХАТАРНОК

                 Душанбе, 13 октябр. (АМИТ «Ховар», Таҳмина Ғоибназарова). – Расиши кӯтоҳи ноқилҳои барқӣ сабаби сар задани 3 сӯхтор дар давоми як ҳафта гардид. Дар ин бора ба АМИТ «Ховар» аз Сарраёсати хадамоти сӯхторхомӯшкунии ВКД — Ҷумҳурии Тоҷикистон хабар доданд. Пайваст шудани таҷҳизоти зиёди гармидиҳӣ ва истифодаи нодурусти ноқилҳои барқӣ, боиси сар задани сӯхтор дар манзили одамон мешавад. Аз ҷумла, 7 октябр дар хоҷагии сокини маҳаллаи «Пахтакор» — и ноҳияи Восеъ Саттор Одинаев дар натиҷаи расиши кӯтоҳи ноқилҳо дар ҳудуди 48 метри квадратӣ сӯхтор ба амал омада анбор, коҳдон ва иншооти чӯбинро ба коми худ кашид. Зарари расида 1800 сомониро ташкил медиҳад.                Умуман аз 5 то 12 октябр дар ҳудуди ҷумҳурӣ 19 ҳодисаи сӯхтор ба қайд гирифта шуд. Дар вилояти Хатлон 7, дар вилояти Суғд 4, дар шаҳри Душанбе 5 ҳодисаи сӯхтор ба амал омад. Зарари умумии аз сӯхторҳо расида 15 ҳазору 690 сомониро ташкил медиҳад.