ПЕШНИҲОДИ МУФИДИ ПРЕЗИДЕНТИ ТУРКМАНИСТОН

                Ашқобод, 2 октябр. (АМИТ «Ховар», regnum.ru). – Президенти Туркманистон Қурбонгулӣ Бердимуҳаммадов 1 октябр зимни сӯҳбат бо намояндагони воситаҳои ахбори оммавии мамлакаташ изҳор намуд, ки Туркманистон, Ӯзбекистон, Қазоқистон ва Қирғизистон бояд ба ивази истифодаи ҳаҷми имрӯзаи оби дарёҳои сарҳадгузар ва ҳалли проблемаҳои энергетикӣ ба Тоҷикистон маблағи муайян диҳанд.                  Г.Бердимуҳаммадов зикр кард, ки сарчашмаи дарёҳои асосии минтақаи Осиёи Марказӣ дар қаламрави Тоҷикистон воқеъ мебошанд. Ин мамлакат баъди барҳам хӯрдани Иттиҳоди Шӯравӣ аз нарасидани қувваи барқ танқисӣ мекашад. Ҳукумати Тоҷикистон барои ҳалли ин проблема сохтмони нерӯгоҳҳои нави барқи обиро пеш гирифтааст. Ин иқдом дар оянда сабаби коҳиш ёфтани маҷрои дарёҳо ва нарасидани об дар мамлакатҳои поёноби дарёҳои Сир ва Ому гардида метавонад. Проблемаи мазкур сол то сол ҷиддитар гардида, сабаби муташанниҷ гардидани муносибатҳои мамлакатҳои минтақа шуда метавонад.                  Қ.Бердимуҳаммадов дар робита мамлакатҳои поёноби минтақа — Ӯзбекистон, Қазоқистон ва Қирғизистонро даъват кард, ки масъалаи мазкурро якҷоя ҳал намуда, ба ивази оби дарёҳои Тоҷикистон барои ҳалли проблемаҳои истифодаи захираҳои обу энергетика маблағи муайян ҷуброн намоянд.                  Ба ақидаи коршиносон, баъди 5 –10 сол проблемаи бо оби ошомиданӣ таъмин намудани аҳолии ҷаҳон аҳамияти аввалиндараҷа пайдо хоҳад кард.