АМАЛИЁТИ НАХУСТИНИ ИВАЗ НАМУДАНИ ГУРДА

                    Душанбе, 9 ноябр. (АМИТ «Ховар», Ибодат Давлатова). — Дар Маркази ҷумҳуриявии бемориҳои гурдаи Вазорати тандурустӣ дар арафаи ҷашни 15-солагии Бахтномаи миллат — рӯзи 5 ноябр бори аввал дар таърихи кишвар аз тарафи мутахассисони тоҷик амалиёти иваз намудани гурда бомуваффақият гузаронида шуд.                     Тавре аз маркази матбуоти Вазорати тандурустӣ ба мухбири АМИТ «Ховар» иттилоъ доданд, вазъи саломатии бемор сокини 22 солаи ноҳияи Вахши вилояти Хатлон Ҳабибулло Каралиев айни ҳол хуб мебошад.Бояд зикр намуд, ки Вазорати тандурустӣ дар доираи омодагирӣ ба амалӣ намудани чунин ҷарроҳии мураккаб, бо дастгирии бевоситаи Сарвари давлат аз оғози соли равон тамоми таҷҳизоти замонавии ташхисиву табобатиро аз ҳисоби маблағҳои буҷетӣ ворид намуда буд.