ПОЙГА АЗ ТУРСУНЗОДА ТО РОҒУН

                   Душанбе, 20 ноябр. (АМИТ «Ховар», Пайрав Назаров). — Аз 21 то 24 ноябр бахшида ба Рӯзи Парчами миллии Тоҷикистон дар роҳи мошингарди Турсунзода — Шаҳринав – Ҳисор – Душанбе – Ваҳдат – Файзобод то шаҳраки бинокорони нерӯгоҳи барқи обии Роғун дар масофаи 175 километр пойга ташкил карда мешавад.                   Аз Кумитаи ҷавонон, варзиш ва сайёҳии назди Ҳукумати ҷумҳурӣ ба АМИТ «Ховар» хабар доданд, ки барои гузаронидани пойгаи мазкур тамоми тадбирҳои зарурӣ андешида шудаанд.                     Қайд карда шуд, ки иштирокчиёни пойга бо тамоми асбобу анҷоми зарурӣ таъмин гардиданд, онҳоро кормандони БДА ВКД ҷумҳурӣ ва духтурон ҳамроҳӣ мекунанд. Иштирокчиёни пойга баъди анҷоми он бо коргарони НБО Роғун мулоқот хоҳанд кард.