САҲМИЯҲО ВА СЕРТИФИКАТҲОИ САҲМИЯҲОИ НБО «РОҒУН»

                  Душанбе, 14 декабр. (АМИТ «Ховар», Покиза Маҳмадбекова). – Вазорати молияи Ҷумҳурии Тоҷикистон ҳамроҳи Ҷамъияти саҳҳомии НБО «Роғун» бо мақсади ҷалби сармояи дохилӣ ба сохтмони Нерӯгоҳи барқии обии «Роғун» аз моҳи январи соли 2010 сар карда, ба нашри саҳмияҳо бо арзиши 100 сомонӣ ва сертификати саҳмияҳо бо арзиши 500, 1000 ва 5000 сомонӣ шурӯъ менамояд.                     Саҳмияҳо ва сертификатҳои онҳо ба маблағи то 5000 сомонӣ бо роҳи додани саҳмияҳои ҳуҷҷатӣ ба номи соҳибони онҳо фурӯхта мешавад. Симоҳои ҳуқуқӣ ва воқеӣ, ки саҳмияҳоро ба маблағи то 5000 сомонӣ мехаранд, соҳибони саҳмияҳои ҳуҷҷатӣ мегарданд. Ба касоне, ки аз маблағи 5000 сомонӣ зиёд саҳмияҳоро харидорӣ мекунанд, сертификатҳои махсус дода хоҳад шуд. Ин сертификатҳо дар вазорати молияи Ҷумҳурии Тоҷикистон ба қайд гирифта мешаванд.                     Ба вазорату идораҳо, корхонаҳо, муассисаҳо ва бонкҳое, ки саҳмияҳои Роғунро мехаранд, сертификатҳои махсус дода мешавад. Ин сертификатҳо низ дар вазорати молия ба қайд гирифта мешаванд.                    Дар вазорати молияи Ҷумҳурии Тоҷикистон ва Бонки давлатии амонатгузории «Амонатбонк» барои ҷамъ овардани маблағҳои фурӯши саҳмияҳо ва сертификатҳои онҳо бо пули миллӣ ва асъори хориҷӣ суратҳисобҳои алоҳида кушода шудаанд.                     Хоҳишмандон роҷеъ ба ҳамаи масъалаҳои марбут ба харидани саҳмияҳо ба вазорати молияи Ҷумҳурии Тоҷикистон муроҷиат карда метавонанд.