ЭРОН КАЙҲОНРО ФАТҲ МЕКУНАД

Теҳрон,   4  феврал. (АМИТ «Ховар» — глобал.рус). —  3  феврал  дар  пойтахти  Эрон  маросими  шиносоӣ  бо   радифҳои нави   маснӯи «Мисбоҳ – 2», «Тулӯъ», «Навид» ва «Симурғ» баргузор  гардид. Дар  маросими  мазкур  Президенти  Эрон  Маҳмуд  Аҳмадинажод иштирок  дошт. Вазири  мудофиаи  Эрон  Аҳмади  Воҳидӣ  ба  хабарнигорон   гуфт, ки   чанде  пеш   ба  воситаи  ракетаи  барандаи  «Қавошгар – 3» ба  фазои  кайҳон  ҳайвоноти  зинда,  аз  ҷумла мушҳо,  сангпуштҳо  ва  намудҳои гуногуни  ҳашарот  фиристода  шуданд. Тайёрӣ  ба  фиристодани  ҳайвонот  ба  фазои  кайҳон  дар  Эрон  ду  сол  давом  дошт.  Моҳи  ноябри  соли  2008  Эрон  ракетаи  барандаи  «Қавошгар – 2» -ро  ба  фазои  кайҳон  бароварда буд.  Ракетаи  мазкур   дастгоҳҳои  илмиро   ба  кайҳон  баровард. Қисмати  баргардандаи   ракета  баъди  40  дақиқа  ба  Замин  фуромад. Дастгоҳҳои он  фишори  ҳаво  ва  суръати  вазиши  шамолро  дар  баландиҳои  аз  50  то 200  километр  муйян  намуданд. Бояд  гуфт, ки  3  феврал дар  Эрон  Рӯзи  миллии   таҳқиқи  фазои  кайҳон  эълон  шудааст. Вазири  алоқаи  мамлакат  Ризо Тақипур  ба  хабарнигорон  гуфт, ки  ҳамаи  ин  ракетаҳо ва  радифҳои  маснӯъро  мутахассисони  маҳаллӣ  сохтаанд. 3  феврали  соли  2009   дар  Эрон  радифи  маснӯи «Умед»  ба  воситаи  ракетаи  барандаи  «Сафир»  ба  фазои  кайҳон  бароварда  шуда буд.  Рӯзҳои  наздик  дар  Эрон  барои таҳлили  маълумоти  радифҳои  маснӯъ  маркази  махсуси  илмӣ кушода  хоҳад  шуд.