ГАРМХОНА — МАНБАИ СЕРДАРОМАД

Абдуҳалим Раҳмоновро ҳамчун лимӯпарвари номӣ дар ноҳияи Б.Ғафуров ҳамагон мешиносанду, ҳурмату эҳтиромаш мекунанд. Зеро вай аз хурдсолӣ дар таҳти соябонии падари бузургвораш Абдураҳим Раҳмонов нозукиҳои ин касби пуршарафро омӯхтааст. Соли 2007 бо дастгирии раиси вилоят – Коҳир Расулзода дар Ассотсиатсияи хоҷагии деҳқонии ба номи Домулло Азизови ноҳияи Б.Ғафуров хоҷагии деҳқонии «Абдураҳим-саркор»-ро ташкил намуд. 16 гармхонаи таи чанд солҳо бекор хобидаро, ки дар ҳолати харобӣ буд аз нав барқарор ва обод кард. Замоне аз ин гармхонаҳо падараш Абдураҳим-саркор тамоми вилоятро бо лимӯи тару тоза таъмин менамуд. Инак, гармхона аз нав эҳё гардид. Руҳу арвоҳи  падарашро шод кард. Ҳоло  хоҷагии деҳқоние, ки Абдуҳалим Раҳмонов сарварӣ менамояд, ба ғайр 16 гармхона майдони пахтазор, боғу майдон дорад ва соли ҷорӣ аз он ҳосили фаровон ба даст овард. Аз ҳисоби даромадҳои хоҷагии Абдуҳалим аҳд кардааст, ки ба маблағи 50 ҳазор сомонӣ саҳмияи НБО «Рогун»-ро харидорӣ намояд. Аз ҳисоби пасандози оилавиаш аллакай вай дар ду марҳила ба маблағи 11 ҳазор сомонӣ саҳмия харидорӣ намуд.