ИЗОФАНАВИСӢ ДАР ИҶРОИ КОРҲО

Душанбе, 3 феврал. (АМИТ «Ховар», Лаззат Диловарзод).- Бино ба гуфти ваколатдори фаврии шӯъбаи пешгирии коррупсия Шарифбек Шарифбеков, дар вақти гузаронидани санҷишҳои молиявӣ дар сохтмони иншооти «Варзишгоҳи  «Металлург» -и шаҳри Турсунзода», муайян карда шуд, ки аз тарафи шахсони мансабдори корхонаи фаръии «Алюминсохтмон» — и КВД «Ширкати алюминии Тоҷикистон» дар рафти тартиб додани  санадҳои иҷроиши кор дар давоми солҳои 2007 – 2008 дидаю дониста, қасдан бо роҳи нодуруст нишон додани ҳаҷми кори иҷронакардаи худ, аз ҷумла рехтани бетони тайёр, сохтани рави оҳану бетонӣ, чидани хишти деворҳои беруна ва ғайра, дар 28 ҳолат ба маблағи 152 ҳазор сомонӣ ба изофанависӣ роҳ дода, маблағи мазкурро тасарруф кардаанд. Раёсати тафтишоти Агентӣ бо моддаи 245 қ.4 (азхудкунӣ ё исрофкорӣ) ва моддаи 340 қ.2 (сохтакорӣ) – и КҶҶТ  нисбати шахсони мансабдори корхонаи «Алюминии тоҷик» парвандаи ҷиноӣ оғоз карда, тафтишот мебаранд.