МАҲБАС БА С.БОБОАЗИЗОВ «ДАРСИ ПОРА» МЕОМӮЗАД

Душанбе, 12 феврал. (АМИТ «Ховар», Лаззат Диловарзод).- Эътимоди мардум ба Агентии НДМ ва мубориза бо коррупсияи ҷумҳурӣ рӯз то рӯз бештар мегардад ва шаҳрвандон  дар бисёр маврид барои имдодталабӣ  ба он муроҷиат мекунанд. Шаҳрванд «А» ҳам  имдодталабона ба агентии мазкур муроҷиат намудааст, ки муовини раиси ноҳияи Рӯдакӣ Саид Бобоазизов, ки соҳиби 6 фарзанд аст ва аз касе тарсу ҳарос надорад, барои ҷудо намудани 0,8 га қитъаи замини назди ҳавлигӣ ба сифати пора 6 ҳазор доллар талаб кардааст. Рӯзи 20 – уми январ  дар вақти гузаронидани амалиёти  фаврӣ — тафтишотӣ пас аз гирифтани пора ба мблағи 6 ҳазор доллари амрикоӣ аз шаҳрванд «А»  С . Бобоазизов дастгир шуд. Раёсати тафтишотии Агентии НДМ ва мубориза бо коррупсия нисбат ба амали ғайриқонунии С. Бобоазизов бо моддаи 319 қ.4 (гирифтани пора) – и КҶҶТ парвандаи ҷиноятӣ кушода,  тафтиш мебарад. Дар сурати аз ҷониби суд  тасдиқ шудани гуноҳ, С. Бобоазизов ба мӯҳлати 5 сол дар маҳбас «дарси пора» меомӯзад.