МАРОСИМИ САВГАНДЁДКУНИИ АФСАРОНИ ҶАВОН

Душанбе, 8  феврал. (АМИТ «Ховар», Таҳмина  Ғоибназарова). —  Дар  арафаи  иди  85 – солагии  милисаи  мамлакат  дар  майдони «Дӯстӣ»  маросими  савгандёдкунии  кормандони  ҷавони   Вазорати  корҳои дохилии  ҷумҳурӣ  баргузор  гардид. Дар  маросими мазкур   вазири  корҳои  дохилии  мамлакат,  генерал – лейтенанти  милиса  Абдураҳим  Қаҳҳоров  иштирок  дошт. Ҳамон  рӯз  ба  дастаи милисаи таъиноти  махсус,  ротаи махсуси  милиса  ва  артиши  дохилии  ВКД ҷумҳурӣ  100 нафар  афсари  ҷавон  шомил  гардид. Дар  фарҷоми  он  маросими расми  гузашти ҷузъу  томҳои  мақомоти  корҳои  дохилии  Тоҷикистон  баргузор  гардид. Аз  дафтари  матбуоти  ВКД  ҷумҳурӣ  ба  АМИТ «Ховар»  хабар  доданд, ки  иди  касбии кормандони  милиса   рӯзи  6 феврал дар тамоми  шаҳру  ноҳияҳои  мамлакат  муташаккилона  ва ботантана  гузашт. Теъдоди  хеле  зиёди  кормандони  милиса рӯзҳои  таҷлили  иди касбиашон кор карда,  дар таъмини тартиботи ҷамъиятӣ  саҳми  калон гузоштанд.