МУРОҶИАТИ ЭКОЛОГҲО

Душанбе,  22  феврал. (АМИТ «Ховар», Людмила  Дубинина). – Маҳфили  созмонҳои  ҷамъиятии  экологии Тоҷикистон  ба  унвони  раиси  Кумитаи  ҳифзи  муҳити  зисти  назди  Ҳукумати  Тоҷикистон  Хурсандмурод  Зикиров  муроҷиатнома  фиристода,  аз  фаъолияти  корхонаҳои  коркарди  фулузоти  дохили  шаҳри  Душанбе  изҳори ташвиш  намуданд. Дар  муроҷиатнома  гуфта  мешавад, ки  дар  фаъолияти  корхонаҳои  коркарди  фулузоти  шаҳр  меъёрҳои  экологӣ   риоя  карда  намешавад. Созмонҳои  ҷамъиятии экологӣ  аз  ташкили  комиссияи  махсус  барои  тафтиши  фаъолияти  чунин  корхонаҳо  изҳори  қаноатмандӣ   менамоянд. Қайд  карда  мешавад, ки  ин  иқдом  барои  андешидани  тадбирҳои  амалӣ  ва  ҳамкорӣ  дар  масъалаи  ҳифзи  муҳити  зист  аҳамияти  калон  дорад. Дар  муроҷиатнома  пешниҳод  карда  мешавад, ки  ҳисоботи  комиссияи  Кумитаи  ҳифзи  муҳити  зисти  назди  ҳукумати  ҷумҳурӣ  дар  масъалаи   фаъолияти   корхонаҳои  коркарди  фулузот   ба   маҳфили  созмонҳои  ҷамъиятии  экологӣ   пешниҳод  карда  шавад. Лоиҳаи  қонун   дар  бораи  ворид  сохтани тағйироту  иловаҳо  ба қонун «Дар  бораи  додани иҷозат  ба  баъзе  намудҳои  фаъолият» бо  мақсади бартараф  сохтани  камбудиҳои  қонунгузории  соҳаи  коркарди  фулузот  ба  Маҷлиси  намояндагон  пешниҳод  карда  шавад.