ОВОЗДИҲӢ БАРОИ ОЯНДАИ НЕКИ МАМЛАКАТ

        Душанбе, 28 феврал. (АМИТ «Ховар», Кристина Эрлих). — Субҳи имрӯз овоздиҳӣ дар қитъаҳои интихоботии рақамҳои 17 ва 18 ноҳияи Фирдавсӣ, ки дар мактаби миёнаи рақами 24 воқеанд, муташаккилона оғоз ёфт.       Раиси қитъаи интихоботии рақами 17 , директори мактаби миёнаи рақами 24 Ҳалима Саидалиева гуфт, ки дар ин ҷо 2352 интихобкунанда овоз медиҳад. Вай зикр намуд, ки овоздиҳӣ комилан мувофиқи қонунгузории миллии интихобот оғоз ёфт ва дар ҷараёни он ягон камбудию қонуншиканӣ ба қайд гирифта нашуд. Дар мактаби мазкур то соати 9 – у 50 дақиқа бештар аз 450 нафар овоз дод, ки қариб 30 фоизи шумораи умумии интихобкунандагонро ташкил медиҳанд.       Мухбири АМИТ «Ховар» хабар медиҳад, ки дар қитъаи интихоботии рақами 18 – ум 2080 интихобкунанда ба қайд гирифта шудааст. Раиси қитъаи интихоботӣ, муовини директори мактаб Лола Авезова изҳор намуд, ки то соати 10 дар ин ҷо 499 нафар овоз дод.       Ҷараёни интихоботро дар ин қитъаҳои интихоботӣ намояндагони ҳизбҳои сиёсӣ назорат мекунанд.       Намояндаи Ҳизби халқии демократӣ Тоҷиддин Қурбонов зикр намуд, ки одамон субҳи барвақт бо рӯҳияи идона ба қитъаҳои овоздиҳӣ меоянд. Интихобот барои аксарияти онҳо ба маънои томаш ид мебошад. Баъзеҳо ҳатто шикоят мекунанд, ки маъракаи овоздиҳӣ бе ягон тантана ва мусиқӣ давом дорад.      Намояндаи Ҳизби наҳзати исломӣ Аргулон Алиева изҳор намуд, ки қисмати бештари интихобкунандагон ҷавононанд. Ҳамаи онҳо дар интихобот бо рӯҳияи баланд ширкат меварзанд. Дар ҷараёни овоздиҳӣ ягон бетартибӣ ва вазъияти муташанниҷ ба қайд гирифта намешавад. Ҳамаи шаҳрвандон номзадҳои арзандаи худро сарбаландона интихоб менамоянд.