ОЗМУНИ ЭҶОДӢ БАРОИ ЖУРНАЛИСТОН

Душанбе,  19  феврал. (АМИТ «Ховар», Кристина  Эрлих). —  Вазорати тандурустии  Ҷумҳурии  Тоҷикистон  ҳамроҳи  Созмони  ғайридавлатӣ ва  ғайритиҷоратии  байналмилалии «Хоуп» ва  Муассисаи  «Аутрич  дар ҳифзи  саломатии  мардум»,  ки  аз  ҷониби  Агентии  рушди байналхалқии  ИМА  маблағгузорӣ  карда  мешавад,  дар  соҳаи  журналистика  барои  мақолаҳо ва барномаҳои  электронӣ  дар  мавзӯи   пешгирӣ  ва табобати  бемории  сил   озмун  эълон  менамояд.  Озмуни  мазкур  бо  мақсади  дастгирӣ  намудани  Барномаи  миллии  табобати  бемории  сил  эълон  карда  мешавад. Барои онҳое, ки дар  озмун  ҷои  аввалро  ишғол  менамоянд,  1300 сомонӣ,  барои  ҷои  дуюм 800  сомонӣ  ва  ҷои  сеюм  500 сомонӣ мукофот дода  мешавад.  Дар  озмун   мақолаҳои дар  матбуот чопшуда ва барномаҳои  телевизионӣ,  радио ва интернет иштирок  карда  метавонанд, ки  аз  20  марти  соли  2009  то  10  марти  соли  2010 таҳия  ва  нашр  карда  шудаанд. Зимни  пешниҳоди  мақолаҳо  ва барномаҳо  рӯзи  чопи онҳо,  рубрика,  мавзӯъ,  муаллиф  ё  гурӯҳи  муаллифон   бояд  аниқ  зикр  карда  шаванд. Мақолаҳо  ва  барномаҳои  ба  озмун  пешниҳодшаванда  дар  дафтари  матбуоти  Вазорати тандурустӣ  қабул  карда  мешаванд.