САҲА РАСОНДАНИ КӮМАКРО БА ТОҶИКИСТОН ДАВОМ МЕДИҲАД

Душанбе,  18  феврал. (АМИТ «Ховар», Наталя  Михайлова). —  Директори Агентии  назорати  маводи  нашъадори  назди  Президенти  Ҷумҳурии  Тоҷикистон  Рустам  Назаров  дирӯз  бо  роҳбари  намояндагии  Созмони  амнияту  ҳамкории  Аврупо  дар  Тоҷикистон, сафир  Ивар  Викки  мулоқот  кард. Зимни  мулоқот  масъалаҳои  ҳамкории  оянда   дар  соҳаи   пешгирии  нашъамандӣ  ва  иҷрои  барномаҳои  марбут ба  ташвиқоту тарғиботи  зидди  маводи  нашъадор  дар  ноҳияҳои  наздисарҳадии  ВМКБ,  вилоятҳои  Суғду  Хатлон  ва  ноҳияҳои тобеи  марказ муҳокима  карда  шуданд. Роҳбари  намояндагии  САҲА  дар  Тоҷикистон  зикр  намуд, ки   созмон   маблағгузориро  барои  иҷрои  барномаҳои  мубориза ба  муқобили  маводи  нашъадор  дар  Тоҷикистон   дар  соли  2010  низ  давом  медиҳад. И.Викки  афзуд, ки  САҲА ба  фаъолияти Агентии  назорати  маводи  нашъадори  Тоҷикистон  ва тадбирҳои  Ҳукумати  мамлакат  дар  мубориза ба  муқобили  маводи  нашъадор  баҳои  баланд  медиҳад. Инчунин  масъалаҳои ташкили   курсҳои  кӯтоҳмуддати такмили  маҳорати  касбии  кормандони   дафтарҳои  матбуоти  мақомоти  муҳофизи  қонун  ва   сохторҳои  низомии  Тоҷикистон   мавриди баррасӣ  қарор  гирифтанд.  Дар  фарҷоми  мулоқот  изҳори  умед  карда шуд, ки  ҳамкории  Агентии  маводи  нашъадори  Тоҷикистон  бо  намояндагии  САҲА  дар  мубориза ба  муқобили  маводи  нашъадор  дар  оянда  ҳам  давом  дода  мешавад.