ТӮҲФА БА ТАРБИЯГИРАНДАГОНИ МАКТАБ — ИНТЕРНАТ

Душанбе,  19  феврал. (АМИТ «Ховар», Людмила  Дубинина). – Мактаб —  интернати  бачагони  нобинои  ноҳияи  Ҳисор  соли  1961  кушода шуда буд.  Соли  аввали   ташкили   мактаб – интернат  дар он  ҳамагӣ  14 нафар  кӯдаки  нобино   тарбия  карда  мешуд.  Имрӯз  дар  ин  ҷо  112  нафар  таълиму  тарбия  дода  мешавад. 12  омӯзгори  мактаб – интернат  унвони «Аълочии  маорифи Ҷумҳурии Тоҷикистон»  доранд. Мухбири  АМИТ «Ховар»  хабар  медиҳад, ки  гурӯҳи  намояндагони  Фонди  байнидавлатии  ҳамкории  гуманитарии  ИДМ  зимни  сафарашон   ба  Тоҷикистон  17  феврал  аз  мактаб – интернати  мазкур  боздид  ба  амал  оварданд. Меҳмонон  ба  тарбиягирандагон  мактаб —  интернат  китобҳои  гуногуни  дарсӣ,  асбобу  анҷоми  аёнии таҳсил,  ки  махсус барои  нобиноён  таҳия  шудаанд,  инчунин  телевизор ва  бозичаҳои  гуногун  тӯҳфа  карданд. Роҳбари  ҳайати  фонд  Татяна  Бубнова  зикр  намуд, ки  дар  оянда  ҳам  ба  талабагони  мактаб – интернат  кӯмаки  хайрия  расонда  хоҳад  шуд. Дар  маросими  супуридани  тӯҳфа ба  талабагони  мактаб – интернат  вазири  маорифи  ҷумҳурӣ  Абдуҷаббор  Раҳмонов  низ  ҳузур  дошт. Вай  зикр  намуд, ки  дастпарварони   мактаб – интернат  баъди  хатми  таҳсил  бе ягон  монеа  ба  мактабҳои олӣ  дохил  шуда  метавонанд. Вазорати  маориф  ҳамроҳи  мақомоти  иҷроияи  ҳокимияти  давлатии  ноҳия  тарбиягирандагони боистеъдоди  чунин  муассисаҳои таълимиро  ҳамеша  дастгирӣ  менамояд,  гуфт  вазир.