ТАРМА РОҲҲОРО БАНД КАРД

Хоруғ, 8 феврал. (АМИТ «Ховар», Л.Додо) — Тавре навбатдори идораи «Помирнақлиёт» Аноятшоҳ Некқадамов ба мухбири АМИТ «Ховар» иттилоъ дод, субҳи имрӯз дар натиҷаи боридани барфи зиёд роҳҳои мошингарди байни ноҳияҳои Шуғнон — Хоруғ ва Хоруғ — Душанбе дар километри 480 воқеъ дар ноҳияи Рӯшон баста шуданд. Идораҳои роҳсозии вилоят бо истифода аз техника  ба тоза кардани роҳҳо дар минтақаҳои зикршуда оғоз карданд. Дар натиҷа роҳи автомобилгарди Роштқаъла — Хоруғ кушода шуд. Роҳи Душанбе-Хоруғ ҳануз дар километри 480 бастааст. Мувофиқи иттилои идораи нигоҳубини роҳҳои вилоят дар баъзе мавзеҳои роҳи автомобилгарди водии Ғунд (километри 630, 677, 697, 707) низ тарма фаромада, ҳаракати нақлиёт боздошта шудааст. Айни ҳол тозакунии роҳҳо аз барф ва тарма идома дорад.