ТАРОЗУҲОИ ЧИНОИЮ ЭРОНӢ БАРЧИДА МЕШАВАНД

Душанбе, 9 феврал. (АМИТ «Ховар», Марзия Саидова).- Ояндаи наздик бо мақсади ҳимояи ҳуқуқи истеъмолкунадагон аз тамоми бозорҳои шаҳр тарозуҳои ғайристандартии сохти чиноию эронӣ барчида мешаванд. Ин масъала дар ҷаласае, ки дар ҳузури Раиси шаҳри Душанбе Маҳмадсаид Убайуллоев доир шуд,  баррасӣ гардид. Дар робита Раиси шаҳр директорони бозорҳои КВД «Савдо ва бозорҳои шаҳри Душанбе» -ро супориш дод, ки дар мӯҳлати ду ҳафта аз тамоми бозорҳои шаҳр тарозуҳои ғайристандартии истеҳсоли чинию эрониро барчида,  барои хизматрасонӣ ба мизоҷон тарозуҳои электрониро таъмин созанд. Дар ҷаласа, баҳри таъмини назорати воридот ва савдои маҳсулоти хушсифат дар бозори истеъмолии пойтахт ва ба ин васила тақвият бахшидан ба амнияти истеъмолию ҳимояи ҳуқуқи истеъмолкунандагон зикр шуд, ки ҳамкории мутақобилаи Агентии «Тоҷикстандарт» бо масъулини бозорҳои шаҳри Душанбе ҷоннок карда шавад. Бо ин мақсад таъкид  шуд, ки комиссияи муштараки сохторҳои назорати давлатӣ бо иштироки бевоситаи масъулини Агентии мазкур ҳолати мутобиқати маҳсулоти ба фурӯш гузошташавандаи бозорҳои шаҳр ва хизматрасониҳо дар ин самт  ба талаботи стандартиро мавриди санҷиш қарор диҳад.   Ба сохторҳои марбутаи шаҳрӣ дастур дода шуд, ки ҳолати насб ва истифодаи мақсадноки мошинаҳои назоратӣ- хазинавиро дар тамоми субъектҳои савдою тиҷоратии дар пойтахт буда, зери назорати қатъӣ қарор диҳанд. Аз хадамоти матбуоти Раиси шаҳр ба АМИТ «Ховар» иттилоъ доданд, ки дар ҷаласа директори Агентии стандартизатсия, метрология, сертификатсия ва нозироти савдои назди Ҳукумати ҷумҳурӣ Давлаталӣ Ҳотамов ҳузур дошт.