65 СОЛИ ҲАЁТ ВА 40 СОЛИ ЭҶОДИЁТ

Душанбе, 17 март. (АМИТ «Ховар», Бекназари Абӯбакр). — Нависандаи хушсалиқа ва рӯзноманигори шинохта Аюби Кенҷа 65-солагии зодрӯз ва 40-солагии фаъолияти эҷодиашро дар ҳалқаи ҳамқаламон, аҳли илму фарҳанг ва дӯстдорони каломи бадеъ таҷлил кард. Дар маҳфили ба ин муносибат доиргардида, раиси шӯъбаи вилоятии Иттифоқи  нависандагони Тоҷикистон Аҳмадҷони Раҳмадзод аз фаъолияти эҷодӣ ва рӯзноманигории Аюби Кенҷа нақл карда, гуфт, ки офаридаҳои ӯ дар миёни омма хонандагони зиёд дошта, маҳбубияти нависандаро сол то сол зиёд кардаанд. Аюби Кенҷа солҳои дароз дар рӯзномаҳои «Комсомоли Тоҷикистон», «Тоҷикистони советӣ», «Ҳақиқати Ленинобод», «Шӯълаи умед» ва мухбири махсуси «Ҷумҳурият» дар вилояти Суғд фаъолият карда, муҳаррири Энсиклопедияи советии тоҷик аст. «Оинаи дил», «Қӯшчинор», «Саворони  саманди сафед», «Номбардор», «Инсофи хунполо» аз китобҳои навиштаи ӯ мебошанд.